فنايين القهوة ..~وأنواعها

لازم تبتسم في وجه الضيوف وانت تصب القهوة ولا مانع من بعض العبارات الترحيبية ( يا حيكم الله ، حياكم الله ، مرحبا والله ، نورتونا وشرفتونا، ما بغى البيت يتنور .... الخ يعني من هالنوع )
ويوم بتكونون محترفين شوي حاولوا تبعدون الدلة عن الفنيان بس هب وايد شوي يعني عسب القهوة وهيه تنصب في الفنيان اتطلع صوت يا سلام وريحة القهوة فايحة يا سلام بعد ( اروع قهوة من اروع انسان يصب قهوة )

ولا تنسى وانت تصب انك ما تمزر او تترس الفنيان لا نصه بس لانه العادة جيه لازم تخليهم يستمتعون بشرب القهوة اللذيذة واترياهم ان ردوا عليك الفنيان خالي مافيه شي وحركوه او هزوه يعني انهم خلاص استانسوا على القهوة ولا تصبلهم مرة ثانية ، لكن مافيها شي بعد ان طلبت منه انه يشرب بعد فنيان ثاني ( دليل على الكرم والجود يا اهل حاتم الطائي )

لكن ان عطوك الفنيان بدون ما يحركونه يعني انهم بعدهم يبون يشربون قهوتكم الغاوية ام الهيل والزعفران ( اعزمونا على هالقهوة انزين )


والنهاية بتكون يوم بتاخذ الفنايين والدلة الى الصينية وتيلس مكانك وتبتسم وتسولف